Mëssonand ij pòst ëd Borg Vanchija un lìber dë stòrie cite ch'as leso volënté.

Moschin as dis d'un ch'a toca traté con le mòle, përchè ch'a s'ofend për ròbe da gnente; ij moschin a son peui cole cite cite mosche tant fastidiose ch'as treuvo a nìvole, dzortut ant ij mojiss e ant le zone ùmide. Ma për ij turinèis ël Moschin a l'é ël borgh nà e chërsù fòra dle muraje dla sità, a nòrd est dla Porta 'd Pò, pì o meno ant cola parte che ancheuj as treuva tra Via Matteo Pescatore, na vòta Via dij Pëscador, fin-a a le vie Bava e Vanchija. Ant ël cheur dël borgh a j'era la Contrà dël Moschin, dita 'dcò Contrà dle Pùles (e sòn a dis tut sël pòst!) apeupré doa ancheuj a-i é la via Bava. Ij vocabolari piemontèis a la vos Moschin a parlo 'd zòna malfamà dla Turin d'antan, peui risanà con d'abatiment e 'd neuve costrussion antorn a la fin dl'Eutsent. A la stòria 'd cost borgh a dédica un lìber Gian Enrico Ferraris: "Il Moschino. Origini e leggende di Borgo Vanchiglia. Spigolando fra luoghi, storie e canzoni della vecchia Torino" (Turin, Graphot, pp. 220, euro 16). Gian Enrico Ferraris, che i conossoma bin për esse regista e l'anima dle "Vos grise an libertà" e për avèj contà la stòria 'd cost còro ant ël lìber "Canzoni recuperate", e përché a l'ha da la soa 'dcò 'l lìber su "'L Borgh dël fum", a l'é apassionasse a andé a l'arserca dla stòria minuta dla sità tant che i podoma considerelo un pòch l'Alberto Viriglio dij nòsti di. Mëssonand an archivi pùblich e privà, a-i ven fòra un travaj amusant e anteressant ansema; scrit an italian, ma con tante tante ròbe an piemontèis: tipo da bariera, mësté d'antan, canson, curiosità, frise dë stòria e dë stòrie ch'as leso volënté e fin-a 'n pòch an toco 'l cheur. Ant na sessanten-a 'd capitoj bin smasì, a soa manera, sensa tròpe pretèise, crosiand arcòrd, pensé, notissie stòriche, pagine dë scritor, ideje dròle, òsto, pòst, paròle, come tanti anej 'd na caden-a gropà dal fil ross dle canson e dle figure che an cole contrà a l'han lassà 'n segn, a compon-o la memoria dle radis d'un borgh ëd Turin. Un cit s-cianchèe dë stòria 'd nòsta identità. d'Albina Malerba - dal Vënner dLa Stampa dl'11 ëd Giugn dël 2004

Indietro