Video e dvd për ël caplavor ëd Bersezio. N'edission original ëd Corbetta e Brusa.

Giomai tuti a san che la stòria dël teatro 'n piemontèis a l'ha 'd rèis bin fongà an nòsta tradission leteraria, a parte da l'Alion për rivé a la fiorìa dla stagion risorgimental con ij nòm ch'a l'han fàit nià antorn a Giovanni Toselli, con un che a svantaja su tuti: Vittorio Bersezio (Povragn 1828 - Turin 1900), che con la ciadeuvra 'd "Le miserie 'd Monsù Travèt" a vagna a nòst teatro n'arsonansa europea. Dòp la prima a l'Alfieri dël 1863, cost test antërpretà dal Toselli a l'é stàit rapresentà un bordel ëd vòte e un pòch an tuti ij teatro, e nen mach piemontèis e italian. La comedia a l'é stàita tradota an italian, an venessian e fin-a an alman, ma an piemontèis a l'ha vorsula vëdde a Milan dël 1868 Alessandro Manzoni. Bele se l'atività e la bibliografia 'd Vittorio Bersezio a ten vàire pagine (bastrìa dì che a l'é stàit diretor 'd cola "Gazzetta Piemontese" che dventrà peui "La Stampa"; e ch'a l'ha scrivù euvre stòriche an italian e na bela partìa 'd novele e romans), i podoma dì che se ancheuj cost nòm a l'é ancora tant arcordà, a l'é propi për "Le miserie 'd Monsù Travet", che ant j'ani a son sempe stàite rapresentà: un clàssich. A 140 ani da cola prima, la comedia a l'é stàita portà an sena da la companìa 'd Mario Brusa, con la regia d'Olivero Corbetta, për la rassegna 2003 ëd "Teatro nelle Lingue del Piemonte" soagnà da la Region Piemont. Ant l'ocasion la Fondazione Vittorio Bersezio (ch'a l'ha soa sede ant l'Ufficio dla Pia Compagnia San Paolo: tel. 011/559.69.96) a l'ha realisà 'n video e un dvd con ël pròlogh ch'a fa d'arferiment stòrich e la ripresa dlë spetàcol realisà al Teatro Giacosa d'Ivreja; e për chi a mastia nen tan bin ël piemontèis a-i son ij sot-tìtoj an italian. Tut compagnà da na plachëtta che an pòche pagine a në smon un sentijon motobin fosonant sla vita e sl'euvra dël Bersezio. E a l'é franch na bela ròba che ancheuj soa ciadeuvra as peussa vëdse e sentisse an nòste ca. d'Albina Malerba - dal Vënner dLa Stampa dël 14 ëd Magg dël 2004

Indietro