N'ocasion fiamenga për ëndé a mëssoné al Lingòt tra le publicassion an lenga nòsta.

Giòbia 6 ëd magg, a des ore dla matin, al Lingòt, as deurb la Fera Antërnassional dël Lìber, un dij randevò pì avosà 'd Turin e dël Piemont. N'ocasion galupa për andé a l'arserca dij lìber che a l'é malfé trové da d'àutre part, an manera particolar për ij lìber an piemontèis: e a l'é giusta për sòn che che an coste righe i marcoma j'editor che a publico 'd lìber an lenga nòsta. Ancaminand dal Padiglion 1, a lë Stand D51 trovomo Viglongo, che ansema ai lìber stòrich ëd Còsta, Pietracqua, Autelli, st'an a presenta un volum ch'a cheuj në scrit ëd Boferi e un ëd Costa su Edoardo Calvo e l'edission dël poemèt "Artaban Bastonà"; al D52 as treuva Graphot; al D59 tute le publicassion dël Centro Studi Don Minzoni - Ca dë Studi Pinin Pacòt; mentre al C60, lì davsin, Il Punto - Piemonte in Bancarella. E ancora al Pad. 1, Stand C64, Daniela Piazza, che a l'ha le poesie piemontèise 'd Giovanni Arpino e 'l dissionari "Neuv Gribaud"; e vàire d'àutri editor piemontèis a son an costi anviron: l'Angolo Manzoni, Susa Libri, ecc. Anvece al B21 trovoma Alzani 'd Pinareul con ij sò bej lìber për le masnà. Passand al Padiglion 2, come sempe a-i é la granda area dla region Piemont, e 'dcò j'Istitussion e le Associassion; lì tacà, a lë Stand M36, as treuva l'Artistica Editrice, ch'a l'ha publicà 'l Sant'Albin e la Gramàtica Piemontèisa 'd Brero; sempe lì, la Ca dë Studi Piemontèis doa as peulo vëdse ij prim doi volum dla Stòria dla Leteratura Piemontèisa, ansema a le Canson ëd Gipo Farassino e a tuti ij lìber dël catalogh ëstòrich. E ancor al Pad. 2 a-i son: Priuli e Verlucca, Stand F55, e la Gribaudo, Stand H52, che st'an a pòrta "Rastlèire" 'l Vocabolari d'Alba, dle Langhe e dël Roé 'd Primo Culasso e Silvio Viberti. Al Padiglion 5, Stand U10 dla Compagnia di San Paolo, ant lë spassi dla Fondassion Bersezio, as peul trovesse 'l video e 'l dvd ëd "Le miserie 'd Monsù Travèt" ëd Mario Brusa e d'Oliviero Corbetta. L'itinerari a l'é tut àut che complet, e për sòn i ciamoma përdon ai dësmentià fin da sùbit. d'Albina Malerba - dal Vënner dLa Stampa dël 30 d'Avril dël 2004

Indietro