A torno ij cors organisà da la Region. Scrive e parlé për tuti da Turin a Cone.

A fà set. A l'é la sétima vira che la Cà dë Studi Piemontèis a organisa për cont dla Region Piemont (Assessorà a la Coltura) ij cors che st'ann a së s-ciamo "'L Piemontèis për tuti, scrive parlé". La scomëssa a l'é nen mach ëd ten-e da cont lò ch'an ven da na richëssa che tròp soens a l'é 'ncora considerà da gnente (a fa pa basta fin ...) ò da pòch (al temp dl'inglèis, a va pa basta bin ...) ma 'dcò dimostré che scrive 'n piemontèis a l'é nen, coma serti a continuo a chërdi, impossìbil o mal fé. Tut àutr. Tersa, ma nen ùltima rason, cola 'd corisponde a la lege regional dël 10 d'Avril 1990 (la lege 26), nà për la tùa, la valorisassion e la promossion dl'original patrimòni lenghìstich dël Piemont. Pì 'd tremilasinsent iscrit an ses agn d'atività a dimostro che la veuja 'd chërde a cheicòs ch'a va pi 'n là 'd lò ch'a smija a prima vista a l'é nen pòca. Lòn ch'a cissa a continué. Nen mach. Lòn ch'a cissa a 'nventesse 'd còse neuve. Tant për dì, st'ann i cors a son aumentà 'd nùmer: spatarà 'nt ij capleu dla provincia e 'n tanti d'àutri pòst ch'a son Aich, Alba, Cossà, Dòm, Ivrèja, Moncalé, Mondvì, Pinareul, Salusse, Seraval e da st'ann sì Casal Monfrà, Susa e la Piev, ch'a uniss Verbania e Dom. Duvert a tuti, completament a gratis, ij cors a son fàit ëd neuv lession ëd doe ore pr'un. Pi 'd tërsent lession, na tranten-a 'd professor qualificà (da Giuliano Gasca Queirazza a Tavo Burat, da Massimo Scaglione a Gianfranco Gribàud, da Censin Pich a Sergi Gilardin) për mostré a scrive, lese, parlé 'l piemontèis, a conosse la lenga e la literatura piemontèisa. Le lession a ancamin-o la sman-a coèn a Cone (giòbia 5 ëd fërvé) e a finisso a Susa vënner 4 ëd giugn. A Turin a ancamin-o lun-es 16 ëd fërvé (la sede a l'é la Biblioteca Civica Alberto Geisser ëd Cors Casal 5, da sinch a set ore apress disné). Për iscrivse o avèj tute j'àutre anformassion ch'a peusso serve a basta telefoné a la Cà dë Studi Piemontèis (011/53.74.86, mailto:cspiem@libero.it) opurament presentesse a le lession e fesse scrive lì. ëd Giovanni Tesio - dal Vënner dLa Stampa dël 30 ëd Gené 2004

Indietro