Da Gipo a Gamna, da Scaglione a Gili voilà ël programa dla Region Piemont.

Vintedoi Teatro, vint sità e pais dël Piemont, ondes Companìe, tranteses rapresentassion da gené a avril dël 2004: a son ij nùmer dla rassegna "Il teatro nelle lingue del Piemonte" ch'a fa quat, vorsùa da l'Assessorà a la Coltura dla Region Piemont e dal Consej Regional për "proteggere e promuovere il prezioso patrimonio della nostra identità culturale che il teatro, nella sua immediatezza espressiva rappresenta", coma a scrivo ant ël programa Giampiero Leo, Enzo Ghigo e Roberto Cota. E sòn a l'é pròpi na bela ròba. Pacòt ant un-a dle soe pròse sij Brandé a lo arcomandava già ant j'ani quaranta dël Neuvsent: "Ël teatro a l'é na manifestassion coletiva, a-i vorrà 'l concors ëd tante person-e, 'd tante volontà e 'd tante circostanse". A s'é ancaminasse con Gipo Farassino a l'Erba, "Una sposa tira l'altra", peui "Il Natale di Gelindo", spetàcol ëd marionëtte d'Augusto Grilli soagnà da Mario Brusa al Teatro Alfa (via Casalborgon 16/1) e ch'a andrà peui 'l 31 ëd gené a Castel Alfé; e via via da gené: "La felicità 'd Monsù Guma" dël Teatro Zeta 'd Pier Giorgio Gili; "Come 'n vòl ëd farfalin-e" 'd Michele Bonavero, butà an sena dal Teatro delle Dieci, regìa 'd Massimo Scaglione; "Ël doss Bërgé", 'd Vittorio Sivera e Antonio Bodrero dël Coordinamento Moncalieri Teatro, regìa 'd Fulvio Crivello; "Tòjo. Vita di Vittorio Alfieri raccontata dai servi", dla casa degli Alfieri con la regìa 'd Luciano Nattino; "Contacc" dël Progetto Cantoregi 'd Vincenzo Gamna; "Mariabìssola" dla Companìa dël Biron, test e regìa 'd Chiara Giordanengo; "La casa dei Nespoli" 'd Faber Teater; "Leone Sinigaglia. Musicista europeo ebreo piemontese" dël Progetto Scriptorium, regìa 'd Mario Brusa; "Ant j'euj na storia la nòsta" con ij Musicant ëd Riva 'd Cher. Coma as vëd un bel bochèt ëd teatro nòst. E noi i na daroma notissia vira për vira, për dive 'dcò chijcòs ëd pi dle companìe e dij test. L'organisassion a l'é masentà da la Fondazione Circuito Teatrale Piemonte (për d'àutre anformassion basta telefoné al nùmer 011/516.94.22). d'Albina Malerba - dal Vënner dLa Stampa dël 9 ëd Gené 2004

Indietro