|
Un volum ch'a rastela desmila paròle për conòsse le vos d'Alba e dl'Albèis.
La parlada albèisa a l'ha sò dissionari! A saluta parèj, con sodisfassion,
Donato Bosca, ch'a na firma la presentassion, la publicassion ëd "Rastlèire.
Vocabolari d'Arba, Langa e Roé" për le edission Gribaudo 'd Savian (pp. 640,
20 Euro), con l'agiut dla Fondassion Ferrero, dl'Arvangia e dla Famija
Albèisa. A son piasse cost badò doi autor possà da la passion e da l'amor a
soa tèra: Primo Culasso 'd Tres Tinela e Silvio Viverti 'd La Mora, che për
na desen-a d'ani a l'han travajà a costa arserca për rastlé desmila paròle,
proverbi, manere 'd di ch'a son sangh e sàiva dla tèra 'd Langa e dël Roé,
'd soa gent fosonanta e svicia, marche 'd na coltura ancreusa, ch'a veul nen
esse scancelà. A l'é vnuje fòra un volum spèss, ma ch'as manegia bin; le
paròle a son nen mach butà për alfabet, ch'a ten la prima part dël lìber, ma
'dcò sistemà, ant la sconda part, për grup d'argoment. La grafìa che Culasso
e Viberti a l'han dovrà a l'é cola ch'a s'arfà a la Gramatica ëd Brero, cola
ch'as ciama grafìa piemontèisa moderna, con la giunta 'd modifiche për cole
paròle particolar ch'as treuvo mach an cost teritòri. La ròba ch'a sàuta pi
a l'euj a l'é la r con ël caplèt (n.d.d. : as treuva nen 'nt la mapa dij
carater ëd Windows), për indiché cola manera 'd prononsié la r/l ch'as
treuva mach da coste part. Mëssonoma si e là costa vos ëd Langa:
"Dargnasson": grossé, sensa deuit; "Landàis": surrogato dël cafè ch'a vnisìa
da l'Olanda; "Sbardajà": disordinà, spatarà; "Tortagna": ritortola;
"Ziamante": l'ansema dj'atrass agricoj. Lese ij dissionari a l'é dabon na
ròba amusanta e an giuta a nen fé meuire nòste lenghe mës-ciand ël vin bon
con l'eva tërbola. Com a scriv Antonio Buccolo ant soa presentassion
"Parlare la voce", parlé a l'é vita e a fa vive la lenga. A son ëdcò 'd
Buccolo ij sessanta disegn ch'a soagno 'l dissionari e ch'a servo a vëdde
ròbe, atrass, manere 'd travajé che ancheuj a capita da ràir d'ancontré. Në
strument amportant nen mach për Langa e Roé, ma për tuti ij piemontèis, ch'a
troveran an coste pagine paròle dësmentià, "tant dosse e care come da cit a
t'i-j disìa toa mare".
Indietro |