A l'é torna ora d'armanach e d'agende. Prima dla fila dël 2004 l'"Agenda
Piemontèisa" ch'a seurt a l'ansegna dij Brandé për l'editris Il Punto -
Piemonte in Bancarella. St'agn sì a fan vintesinch dal di che Mario Cerchio
a l'ha ideala dlë stanteut. Bin intèis ch'a l'é n'agenda con tute soe bele
pagine bianche da scrivje ansima, tutun pi che un lìber da marca e da marché
a l'é n'antologìa 'd bele pagine piemontèise. Compagnà dai disegn ëd Mario
Pich e Franchin Gonela e soagnà da Giusep Goria, ch'a scriv ëdcò chiel ëd
poesìe pien-e d'inteligensa filològica e 'd paròle s-ciasse e satìe, deurve
l'agenda piemontèisa di për di a l'é coma intré 'nt un bel giardinèt pien ëd
fiorin-e ch'a slargo 'l cheur e anvito a pijela giusta, a pijela con bel
deuit la giornà (pi che la neuitada) ch'a l'ha da passé.
La sërnia 'd test dij grand dël passà e d'ancheuj a s'ancamin-a con Pacòt,
Nicola, Bianca Dorato, Tavo (na vòta 'dcò Tavio) Burat, Barba Tòni Bodrìe,
Alfieri (un sonèt), set frament an pròsa 'd Dario Pasé. E peui via fòrt:
Costa, Elisa Vanoni Castagneri, Irma Bertagna Conteri, Carlottina Rocco,
Mariolina Passigli, Pinuccia Gamba, Teresina Dutto, Marita Bellino (un bel
pëssion ëd poesìa feminin-a), Briatore, Regis, Comino, Barbafiòre. E a cost
propòsit, vist che parloma 'd poeta dël Mondvì, a l'é vera che la sernia
dl'agenda a veul nen esse n'antologìa sistematica, ma gnente 'd Remigio
Bertolino a l'é nen 'n pò tròp pòch?
Rabastand la bela rablera a-i é 'ncora Ronco, Morel, Agostini, Gioann Bono,
Silvio Bellezza, Bep Ross, Rico Gulin, Albano, Origlia, Alex, Brero, Ara,
Magrassi, Pinòt Casalegno, Isler, Brofferio, Rosa, Balbo, Agostino Bosco, e
na lassoma quaidun për nen nojé. Na manera svicia për amprende che la
literatura piemontèisa a l'é bin viva e ch'a resist nen sensa s-ciodé - con
bon-a fòrsa dël passà - 'd vos neuve novente. Pijé 'n pò 'd poesìa tute le
matin a l'é coma cuché n'euv o - coma aj pias a Bré - coma dì un pò 'd bin.
Gnanca mal për ij temp che vivoma. Gnanca mal.
ëd Giovanni Tesio - dal Vënner dLa Stampa dël 28 ëd Novèmber 2003