D'Ernesto Ollino, ator, cap comich dël teatro piemontèis, con rèis bin fongà
ant la nòsta tèra i l'oma avù ocasion dë scrive an costa rubrica, darmage
pròpi për arcordene soa dipartìa. Se l'amis a l'é pì an mes a noi, lòn che
Ernesto Ollino a l'ha sëmnà për ël teatro a l'ha lassà na marca, a l'ha
lassà chijcòs andrinta a soa Companìa, ant sò publich ch'a meuir nen. A l'é
parèj che adess, 'l sipari dël Teatro dla Paròchia Divin-a providensa, an
via Salbertrand 65, a torna a aussesse për la "Prima Rassegna di Tratro
Piemontese Ernesto Ollino".
"Soa" Companìa, e soa famija, 'l fieul Daniele, a son dasse da fé përché
l'arcord a sia nen mach na parola ant ël cheur, ma la cossiensa che la vita
'd n'òm a va anans travers la përsistensa dl'arcòrd. Coma a scrivo ant ël
Programa dla Rassegna: "La Rassegna Ernesto Ollino a veul non mach fermesse
a l'arcòrd ëd na përson-a, ma a varda a l'avnì 'd n'art e 'd na coltura,
coma conseguensa natural d'un përcors artìstich che Ollino e soa Companìa a
l'han fàit ansema". Con cost but, vënner 7 ëd Novèmber, a neuv ore 'd sèira,
a s'aussa donca 'l sipari për la Companìa Teatral "Ernesto Ollino" Alpini
Borgata Parella. A s'aussa për presenté la comedia còmica d'Alberto Rossini,
"Desvijte ... Tupin!", con la regia 'd Livio Gentile. Vënner 14 ëd Novèmber
a sarà la vòta dla Companìa Teatral "Carla S." con lë spetàcol "Fesse 'n tre
për fene un", doi at còmich ëd Tremagi, ch'a soagna 'dcò la regia. Ël 21 ëd
Novèmber a toca a la Companìa Teatral ëd Giaven "Ij Camolà", con "'T l'has
maj fàit parèj", doi temp 'd Dino Belmondo adatà da Marco Voerzio, regia 'd
F. Lussiana. E vënner 28 ëd Novèmber, la Companìa dla Famija Albèisa
"Marianna Torta Morolin" a presenta "Le miserie 'd Monsù Travèt", la comedia
ciadeuvra 'd Vittorio Bersezio ant un lìber adatament ëd Massimo Scaglione,
ch'a firma 'dcò la regia. E 'l 4 e 5 dë dzèmber a torna con le repliche la
Companìa "Ernesto Ollino" (për anformassion e prenotassion basta telefoné al
nùmer 011/776.47.44).
d'Albina Malerba - dal Vënner dLa Stampa dël 7 ëd Novèmber 2003