|
Tante feste për j'eut sécoj dla fondassion e tre moment d'omagi për Luigi Olivero.
La sità dla Vila, Vilaston, ant la pian-a dj'anviron ëd Turin, a l'ha dedicà
l'anada 2003 a festegé, con vàire manifestassion, j'eut secoj 'd soa
fondassion. Tute le inissiative che a l'han pijà la sbruvëtta ai primi 'd
gené e andran anans fin-a a la vigilia 'd Natal, a son stàite organisà con
ël but dla dëscoverta e valorisassion dle rèis stòriche, ant la convission
ciàira che un pòpol ch'a conòss nen soa stòria a l'é un pòpol sensa coltura.
An costa cornis la Sità dla Vila, cissà da l'Associassion Coltural "Nòste
Rèis", con la colaborassion dla Ca dë Studi Piemontèis, a l'ha dedicà tre
randevò për arcordé Luigi Armando Olivero, un dij pì grand poeta an
piemontèis dël Neuvsent, nà a la Vila ël 2 ëd Novèmber dël 1909, che dòp
avèj girà tut ël mond coma giornalista e avèj portà la poesìa piemontèisa a
confrontesse con cola antërnassional, e avèj passà tuta la vita a roma (che
sfortun-a, n.d.d.), sensa perde gnanca n'onsa 'd sangh nostran, a l'é peui
tornà për sempe an soa "tèra paisan-a".
Prim randevò për l'omagi a Olivero a l'é però a Turin, an Palass Lascaris,
sede dël Consèj Regional, lun-es 20 Otober a ondes ore dla matin, con
l'arcòrd ufissial, tnù da Sergio Gilardino, ch'a presenta 'dcò la neuva
edission dël lìber pì amportant d'Olivero, "Ij faunèt": con aranda al
piemontèis le tradussion an italian e an fransèis. Martès 21 d'Otober a neuv
ore 'd sèira, as torna a la Vila, ant l'Auditorium dle Scòle: ël Teatro
delle Dieci, con la regia 'd Massimo Scaglione, a presenta, soagnà e
presentà da Giovanni Tesio, na letura 'd na sèrnìa 'd poesìe 'd Olivero, con
j'ator Fulvia Roggero e Luciano Bosia. E, përché a l'é peui la pera ch'a
dura mentre le paròle a passo, mercol 22, sirìmonia ufissial për
l'intitulassion a Luigi Armando Olivero 'd na scòla dla Vila.
A son tre moment d'omagi a un poeta che, a diferensa 'd lòn ch'a scrivìa ant
un-a dj'ùltime poesìe d'"Ij faunèt",
"tut lòn che scrivo mi, l'é scrit an sl'eva",
an diso che le paròle d'un poeta a son gravà ancreuse ant la stòria dla
siviltà 'd sò pòpol.
Indietro |