An turin a-i é 'n bel giardin
re 'd Fransa a-j veul gran bin.
S'a podèissa mai avèjlo, an pagand ij sò dené,
vorìa esse re 'd Fransa re 'd Fransa giardiné.
A son ij vers dla canson "L'assedi 'd Turin", sécol XVIII, ch'a deurb ël Cd
d'Ezio Girardi, "Marianna. Musiche e canti attraverso i secoli in Piemonte".
Ëd cost musicista-compositor e cantautor i l'oma già avù ocasion ëd parlé
për ël lìber con Cd "Nine nane, filastròcole, gieugh ëd le masnà. Canson për
ij cit e mùsiche dla tradission piemontèisa", surtì mach l'ann passà.
An cost neuv Cd Ezio Girardi an soagna con na sërnìa 'd 21 composission tra
mùsiche strumentaj, da bal e ij cant tradissionaj che a son stàit cantà ant
ij secoj da la gent piemontèisa. Sitoma "Lassela papì scapé", "Ij coscrit ëd
Napoleon" e tra ij tòch strumentaj "Giromëtta", dël sécol XV, "Gagliarda",
na dansa d'anònim dël sécol XVI, "Branle dë cheval", sempe na dansa dël
sécol XVI.
Ma a son ëdcò amusante e anteressante le composission dl'autor coma "La
roa", na corenta, "Marianna", ch'a dà 'l tìtol al Cd, ch'a l'é na mazurca, ò
'l "Valzer per Lei". La strumentassion a l'é fàita da viòla dij bòrgno,
semiton, ghitara, violin, fluta e dulcimer. Na cita plachëtta ch'anvlupa 'l
Cd a publica ij test e la tradussion an italian. As peul trovesse a Turin da
Piemonte in Bancarella, cors Siccardi 4 e da la Libreria Piemontese, via S.
Secondo 11 e via Garibaldi 11.
Sempe an tema 'd mùsica nòsta, da Varal an riva 'l Cd "La mùsica la vòla
pian" (basta telefoné al numer 0163/54257), canson e vos ëd Daniele
Conserva, poeta, cansonié e regista teatral varalèis, mùsica e arangiament
ëd Marco Prinetti. A son 12 tòch che l'autor a dedica ai pòst pì anciarmant
e segret ëd soa sità: " La piassa dël borgh", "Pont dël Buss", "Contrà dël
bur". Ij test, publicà ant la plachëtta ch'a compagna 'l disco, a son scrit
ant la grafìa dla koiné (a l'han daje na man Piera Mazzone e Nedo Bocchio)
për podèjlo spantié an tut ël Piemont.
d'Albina Malerba - dal Vënner dLa Stampa dël 3 d'Otober 2003