Dodes tòch da le "Canson Piemontèise" për un cd tra satira politica e sentiment.

Na bela coa dël sentenare. Dòp l'edission dle "Canson Piemontèise" che l'ann passà Viglongo a l'ha tornà a publiché ant un-a vesta neuva, a l'é surtije pròpi adess për inissiativa dla Region Piemont [Consèj Regional e Assessorà a la Coltura ansema, soagnà da la Ca dë Studi Piemontèis] ël bel cd dle pi bele canson ëd Brofferio cantà da Gipo Farassino. Angelo Brofferio a podìa nen esse servì mèj. Un poeta për n'autr poeta, na vos për n'autra vos, un torototela 'd lusso për n'autr torototela ch'a l'ha ciucià 'l làit dij clàssich piemontèis. Adess ël cd ëd Gipo a l'é sì e mentre lo scoto an ven da s-ciopaté le man. Titol: "Omaggio a Angelo Brofferio". Bela cuvertin-a (da n'ideja grafica 'd Marco Boetti), bela edission (cudìa da Albina Malerba), bele canson (con le mùsiche originaj elaborà, rangià e direte da Gipo Farassino e da Romano Farinatti). Mach na còsa bëstòrta: bin darmage che 'l cd sia nen an comersi (për avèjlo a toca ciamelo a la Region). Da "Crudel destin" a "Ij bogianen", da "Ël bòsch ëd Vignòle" a "Lë spìrit folèt", da "Sor Baron" a "La carafin-a rota", da "Mè can" a "L'apontament", da "Ij bombon ëd Sor Cont" a "La marmòta", da "Mè ritorn" a "La barchëtta" a son dodes tòch vreman anciarmant, ch'a toco tute le còrde, a van fichesse 'n tuti ij cantin dël cheur e dla ment. A-i é le nuanse e ij color dl'ironìa, dla satira politica, dël dobi sens malissios e dël sentiment pi dësgagià, dël gigèt pi genìt, dël deuit pi grassios ch'a vira ant sò contrari. E la vos ëd Gipo (quaidun-a a na dis, la pì part a-j canta), a l'é na maravija.
Brofferio a l'é stàit deputà al Parlament Subalpin (e peui Italian), scritor ëd teatro, avocat ëd coj gròss, giornalista dij prim, brav a dirige 'd giornaj e a scrive 'd quintalà 'd pagine polémiche, stòrich anedòtich, orator da splesse le man. A l'é gnanca mai mancaje la cossiensa 'd nen esse n'òm da pòch. Ma soa glòria a son stàite le "Canson Piemontèise", sò monument e testament literari. Con cost cd, Gipo a fa nen d'àutr che confermé tut sòn ant la pi bela dle manere.

ëd Giovanni Tesio - dal Vënner dLa Stampa dël 19 dë Stèmber 2003