|
Piemontèis da arconòsse e da garantì për na mossion ch'a l'é sèrnia 'd siviltà.
Ij rëscontr a son fàit për discute e për ten-e 'nformà, coma as disìa 'n
latin, slë "status quaestionis". Nen un cas che a l'ultim rëscontr
antërnassional dë studi an sla lenga e la literatura piemontèisa, ch'a l'é
tenusse ai 10 e a j'11 ëd magg a Palass Bareul, a sia sentusse l'esigensa 'd
ciamesse a che mira soma con la costion dël piemontèis e dle nòste legi
nassionaj ('l Senat ch'a l'ha aprovà la lege n. 3366 "in materia di tutela
delle minoranze linguistiche storiche" tajand fòra ël piemontèis dal nùmer
dle lenghe arconossùe.). Pa bastà che fin-a dal 1981 ël piemontèis a sia
stàit arconossù an sël Rapòrt 4745 dël Consèj d'Euròpa tra le lenghe
minoritarie. Pa bastà che la Region Piemont a l'abia aprovà e modificà ant
ël '97 na lege për la tùa dla lenga piemontèisa come un-a dle quat (con
l'ocitàn, ël franch-provensal e 'l walser) ch'a fan part dël patrimoni
regional. Pì che giust alora ch'a s'insista përchè l'ingiustissia 'd na lege
nassional bëstòrta a sia drissà. E pròpi për sòn a la fin dël rëscontr ëd
Palass Bareul a l'é votasse a l'unanimità na mossion "për la lenga
piemontèisa". Lamentand "un tòrt che a l'ha frapà 'nt ël përfond la dignità
e 'l sens ëd giustissia dla gent dël Piemont", la mossion a ciama che "la
lenga piemontèisa a ven-a giontà a la lista dle lenghe da arconòsse e
garantì". Nen mach, ma che a la Region Piemont "a sia dàita la competensa
legislativa për un bilinguism ufissial italian-piemontèis"; che "a-i passa
pa ancor d'àutri ani për istituì 'd catedre 'd lenga e literatura
piemontèisa ant j'Università 'd Turin e dël Piemont" e che an prevision dij
Gieu olìmpich ëd l'invern 2006 "as fassa an manera che 'l piemontèis a ven-a
considerà lenga co-ufissial ant la sirimònia d'overtura e arlongh tut l'arch
ëd le manifestassion". Coma nen esse d'acòrde? A në smija che sossì a sia
fàit ant lë spìrit ëd salvé tut lò ch'as peul salvesse 'dnans ch'a fassa
neuit. Na sernia 'd siviltà. Fòra da tute le identità blocà, la mossion a
n'anvita a pensé che salvé quaicòs ëd noi a l'é salvé quaicòs ëd tuti.
Indietro |