L'euvra 'd Barba Tòni e Vittorio Sivera an sena a Moncalv, Moncalé e Ivreja.

Ant ël quàder dle inissiative butà an camp da la Region Piemont për deje sàiva al teatro piemontèis, a-i é la rassegna "Il teatro nelle lingue del Piemonte", tersa edission, organisà dal teatro Stàbil Turin Circuito Teatro Regional, che da genè a giugn a pòrta an gir për un pò tut ël Piemont, da Alba a Vërsèj, un bel bochèt dë spetàcoj an lenga nòsta. Saba 12 d'avril a-i va an sena al Cìvich ëd Moncalv la prima d'un travaj d'Antonio Bodrero (Barba Tòni) e Vittorio Sivera: "Ël doss bergé". As trata d'un test, doi temp con mùsica e balèt, ch'a l'era stàit segnalà al "Premio per un testo teatrale nelle lingue del Piemonte" dël 1998 e peui publicà ant la colan-a editorial dla Ca de Studi Piemontèis.
A la sirimònia 'd premiassion, tnua l'ani apress 1999, Barba Tòni a l'era nen present, e purtròp cost nòst grand original poeta an lassava pròpi pòchi mèis dòp, për tornesne për sempe, con sò bërsach an spala a Frasso, sota lë sguard amis dël cel ëd soe montagne 'd Varaita. Ma se 'l poeta a meuir, soa poesìa a resta e as fa tèra e gent, as fa lus e pensé: ij di 'd costa vita-vitòira chi a podrà conteje? Che adess ël Coordinamento Moncalieri Teatro a l'abia decidù 'd rapresenté cost'euvra ch'an conta la stòria-legenda dël doss bergé e 'd Magalì, liberament ispirà a le cròniche 'd guèra dël 1744 ant ël Valon ëd Blins, a l'é franch na manera nen mach ëd giuté 'l teatro piemontèis a trové neuve arzorse, ma 'dcò 'd deje vos a coj scritor che ant ël Neuvsent a l'han fàit granda la leteratura 'd nòsta patria cita e a l'han passane 'l testimòne, përché sgheirèisso nen costa ardità 'd valor.
Për la regia 'd Fulvio Crivello a recitran Francesco Assone, Luca Bertero, Maurizio Bagarotti, Mario Bois, Giovanni Bosio, Renato Cavallero, Enrico Chiavassa, Susanna Garabello, Laura Anna Prochietto, Valeriana Tosco; le mùsiche originaj a son ëd Mario Piovano e Fulvio Crivello. Dòp Moncalv, "Ël doss bergé" a sarà al Matteotti 'd Moncalé ('l 15, 16 e 17 avril) e peui al Giacòsa d'Ivreja('l 7 ëd magg).

d'Albina Malerba - dal Vënner dLa Stampa dël 11 d'Avril 2003