Chi an costi ani a l'ha staje 'n pòch dapress a la leteratura e a la poesìa
piemontèisa, a conòss franch bin ël nòm ëd Remigio Bertolino, un djë scritor
d'ancheuj pì avosà e pì considerà 'dcò da la critica. Bertolino a l'é 'd
cola covà 'd poeta che a l'han ant ël monregalèis soa cun-a e soa
ispirassion pì gënita. Basta pensé a Carlo Regis, a Meco Boetti
(Barbafiòre), ma 'dcò ai pì giovo Carlo Dardanello, Marita Bellino e a na
coalera 'd nòm che a son stàit sislà ant un lìber publicà ant ël 1991, "I
poeti di Mondovì". La fortun-a 'd costi poeta a l'é stàita cola d'avèj savù
scrive ant soa parlada dovrand la grafìa piemontèisa moderna dla scòla 'd
Pinin Pacòt.
Remigio Bertolino, ch'a scriv ant la parlada 'd Montaldo 'd Mondvì, 'd costa
covà a l'é miraco la vos pì auta e squisìa: "una delle voci liriche - a
scriv Giovanni Tesio - più intense dell'intera poesia in piemontese". Dòp la
consacrassion ch'a l'é vnuita con la racòlta "Sbaluch", publicà da la Ca dë
Studi Piemontèis dël 1989, e vàire d'àutri lìber e plachëtte, sempre soasìe,
a seurt adess për l'editris noarèisa Interlinea, ant la colan-a "Lyra", la
neuva cheuita con ël tìtol "Ël vos" (pp. 92, Euro 10), compagnà da na nòta
'd Giovanni Tesio. Na sinquanten-a 'd componiment ch'a confermo Bertolino
una dle ponte dla poesìa, nen mach ant le lenghe cite, dël nòst temp. Coma
"un seugn drinta la tèra", un parlè dru e montagnard as fa lenga dl'anima
profonda 'd na gent e 'd na tèra ch'a l'é tute le tère e tute le gent. Ròbe
cite, gest ch'a smijrìo da gnente, paròle s-ciasse, anghërme 'd memòria
ch'an bolverso 'l cheur e la ment.
"Pèi dël vent siava mé pare
ant un bal sensa fin
chiel e la siessa dindanand
is përdevo sota j'ombre dël verne
...
Fa balé la siessa,
fala piuma tra le man.
Bèica: parèj bala
ël so su l'argent dj'asbrin".
"Nella misura di un Vermeer contadino - sito ancora da la nòta 'd Tesio - è
lui, il poeta, a inventare liricamente il gioco del riscatto,
indissolubilmente legato al segreto della rivelazione".
d'Albina Malerba - dal Vënner dLa Stampa dël 4 d'Avril 2003