"An mè cheur a-i é tanta bin a mè Piemont e tanta veuja 'd crijela". Con
coste paròle "Piemontèis ancheuj" , ël mensil ëd poesia e 'd coltura
piemontèisa fondà vint ani fa da Camillo Brero, as presenta ai letor "a
l'alba djë scond vint ani" con na neuva gràfica, pì moderna e arbiciolùa,
për continué an sla carzà dl'angage 'd costi ani.
Le novità a ancamin-o dal fòrmato, pì cit e pì bon ëd manegé,
n'impaginassion pì ciàira, d'ilustrassion a color. Sëddes pagine, bin
samblà, a peu pré tute an piemontèis, gavà da la pagina "dal libré" ch'a
pùblica 'd recension ëd lìber sël Piemont, scrite an italian. Diretor
responsabil a l'é sempe Camillo Brero, cap redator Remo Bertodatti, la
segreterìa a l'é 'd Marisa Gallo; ant ël Comità 'd Redassion a-i é Censin
Pich, Angelo Orlando, Augusto Dellavalle, Davide Damilan, Michele Bonavero e
Luciano Gibelli, che për ògni nùmer a soagna l'Armanach ëstorich dël mèis,
ch'a l'é na vera galuparìa 'd notissie curiose e anteressante sla stòria dle
nòstre contrà e dle nòstre tère. Ai colaborator ëd sempe, Aldo Barberis, che
a në smon ëd pròse ch'a son ëd tòch ch'an cisso a riflession colturaj e
critiche motobin amportante, Francesco Rubat Borel, Valerio Rollone, Barba
Guido (Guido Musso), mach për fé quàich nòm, a son giontasse 'd neuve firme
coma cola 'd Renzo Rossotti, che ant ël nùmer ëd mars a arcòrda la figura e
l'euvra 'd Don Minzoni.
N'àutra novità a l'é l'atension a la cusin-a piemontèisa con ël menù dël
mèis "smonù dal gentil boca soagnà Tòjo Fnoj", mentre a son stàite goernà la
pagina dël piemontèis ant le scòle, e le paròle crosià, na manera amusanta
'd dësmoresse con nòsta lenga e 'mparela vira vira na frisa mèj. L'editris
dël giornal a l'é coma prima 'l Centro Studi Don Minzoni, ma l'adressa a l'é
cambià: stra 'd Seto 92, 10156 Turin. Tel e fax 011/274.14.47. L'ansëgna a
resta la midema: "Parlé piemontèis ancheuj a l'é già vive ant l'Euròpa 'd
doman". N'ansëgna 'd fiusa e 'd bon augure. Alégher!
d'Albina Malerba - dal Vënner dLa Stampa dël 21 ëd Mars 2003