Antorn a "Le miserie 'd Monsù Travet" tanti d'autri: Boferi, Gipo, Barba Tòni.

Bon-e neuve për ël teatro piemontèis dl'an 2003 ch'a l'ha pen-a pijà la sbruvëtta e che an propon d'amblé la tersa edission dla Rassegna 'd "Teatro nelle Lingue del Piemonte", organisà da la Region Piemont e masentà dal Teatro Stabile 'd Turin-Circuito Teatrale Regionale. Quatòrdes a son le sità, da Alba a Vërsèj, passand për Bardonecia, Casal, Ceva, Coni, Ivreja, Moncalv, Moncalé, Mondvì, Novara, Savian, Turin e Torton-a, doa da gené a giugn set spetàcoj a porteran nòsta lenga an sena. Ël but dla Rassegna, a spiega 'l President dël Consèj Regional Roberto Cota, a l'é col dla difèisa e valorisassion dël patrimòni lenghìstich ëd nòsta Region, ch'as manifesta an vàire manere e cola dël teatro a l'é un-a dle pì amportante: na bela manera për lese 'l present sërcand l'avnì.
Ël programa a ancamin-a con "Le miserie 'd Monsù Travet" 'd Vittorio Bersezio, ant un neuv alestiment dël Teatro Giacosa d'Ivreja con Mario Brusa e la regia d'Oliviero Corbetta, che dop ël Teatro Carignan ëd Turin a sarà an sena 'l 22 ëd gené al Teatro Civico ëd Vërsèj. E peui: lë spetàcol "Rincorrendo il futuro. Canzoni, monologhi e speranze" con Gipo Farassino, për la regia 'd Massimo Scaglione, ch'a part dal Teatro Marenco 'd Ceva 'l 31 gené; "La Brofferiana" con j'ator dël Teatro delle Dieci e Bruno Gambarotta, Fausto Amodei e la balarin-a Elisabetta Tomasi, sempre për la regia dë Scaglione, che a sarà al Teatro Baretti 'd Mondvì giòbia 23 'd gené; "Ël piasì 'd canté", consert-spetàcol 'd romaze, canson e poesìe piemontèise con Susy Picchio, sopran, e 'l maestro Roberto Cognazzo al piano, al Giacosa d'Ivreja 'l 2 ëd fërvé; "Magalì" doi temp d'Antonio Bodrero e Vittorio Sivera con la regia 'd Fulvio Crivello, Coordinamento Moncalieri Teatro, da avril; "Ij pciti Fastidi" e "La gabia dël Merlo" 'd Federico Garelli për la regia 'd Pier Giorgio Gili dël Tearo Zeta, a mars; e "Gent dar bric" dël Gruppo Teatro Angrogna.
Man a man i publichroma tute le date e ij pòst.

d'Albina Malerba - dal Vënner dLa Stampa dël 17 ëd Gené 2003